اخر عدد | الحوار المتمدن

31 كانون الثاني، 2007

دا شعب فقري - أحمد فؤاد نجم


دا شعب فقرى

أحمد فؤاد نجم

نظرًا لأن النعمة فاقت حدها

ولأننا مش قدها

ولأن فعلاً إنجازاتك

فوق طاقتنا نعدها

ولأننا غرقنا في جمايل

مستحيل حنردها

نستحلفك.......نسترحمك

نستعطفك......نستكرمك

ترحمنا من طلعة جنابك

حبتين

عايزين نجرب خلقة تانية

ولو يومين

إسمع بقى

إحنا زهقنا من النعيم

ونفسنا في يومين شقا

عايزين نجرب الإضطهاد

ونعوم ونغرق فى الفساد

بيني وبينك حضرتك

دا شعب فقرى مايستحقش جنتك

أنا عارف إنه شعب ماينفعوش

إلا شارون وبلير وبوش

عايز يجرب الإمتهان

ويعيش عميل للأمريكان

بيمد "غازُه" لإسرائيل

ويومين كمان ويمد النيل

أهو يعنى نشرب ميه واحدة

ندوب فى بعض

ماء وماء وماء

ونفض سيرة الإنتماء

وبلاها نعرة وطنطنة

وتبقى البلاد "مستوطنة "

متسلطنة ومتسرطنة

إيه اللى خدناه م الكرامة والإباء

حبة خطب وكلام...كلام

إحنا راهننا على النظام

ورضينا بخيار السلام

خيار حنسد عين الشمس بيه

علشان مايطلعش النهار

ويطلع لمين؟

حبة معارضة مغرضين؟

وحسب بيان السلطة

شلة مأجورين؟

ياعم فضك سيرة

وإرضى بقسمتك

دا شعب مش فاهم أكيد

يالا أُطرده من رحمتك

وإن كنت غاوى الحكم

خليك مطرحك

حاغطس وأقب وأعود

بشعب يريحك

راضى وعمره مايجرحك

أخرس وما بيسمعش

وأعميلك عينيه

مش كل قرش يبص فيه

مايقولش لأه، وفين، وليه

يضرب ينفض فى السليم

وعلى الصراط المستقيم

كل اللى يعرف ينطقه

عاش الزعيم

يحيا الزعيم


هناك 6 تعليقات:

غير معرف يقول...

Great poem. Describes exactly the status and the extremely low level reached by the Arab people. Good choice Khader.

خضر كنعان يقول...

وانما تأخذ الألباب منه على قدر المعارف والعقول

غير معرف يقول...

Dear anonymous, the poem mocks the propaganda commonly spouted by the Egyptian and other Arab regimes, not the Arab people.

خضر كنعان يقول...

وانما تأخذ الألباب منه على قدر المعارف والعقول

أيوه، او ايون بتعبير آخر

غير معرف يقول...

Dear Anonymous no.3 and why do you think we reached a low level?!
The reason is the propaganda you are talking about.
Feeding our brain is just like feeding our stomach. Shall we be fed useful knowledge then we become leaders otherwise we become..........you know the rest. A7la ta7iye la a7la Khader 3ala sa7et elbloggers!!!:-)

aya almusa يقول...

بحب أسلوب أحمد فؤاد نجم بسيط و رائع بحب قصيدته اللي اسمها في عيد ميلادك الكام و السبعين .