مشاربع قادمة ارجو ان تقدموا اقتراحاتكم

• اولا، التحضيرات لااضراب 4 مايو القادم في مصر مستمرة لكن محصورة بالانترنت تقريبا. اما الشباب في الاردن فعلى "الفيس بوك" وبيبذلوا جهود محمومة، بس وسائل الاعلام الرئيسية متجاهلتهم. انا مشارك بالطبع من موقعي ومع ملاحظاتي، وبدعو لمشاركة وتضامن واسع، ياعمي تعال على 11 وعلى مهلك، خذ وقتك في البيت الصبح، شو معجلك.
  

• النهفة الثانية، انه الشباب في الاردن وعلى ابو غفلة صاروا داقرين بحلق الملك. يعني جيرة الله يا شباب تتفضلوا، يا عمي من شان الله "اهتموا بـالسياسة ولا يهمكوا." "لا تخافوا." اللي شايفه انه الشباب مش خايفين. يبدو انه الملك هو اللي بيسقط مخاوفه عليهم. ممكن مش عاجبهم بعض المطروح سياسيا وتنظيميا في الاردن. بس الصحيح انه في الفترة الاخيرة تحديدا، واذا الموضوع موضوع سياسة، فقد طلع منهم طحين العمى: الشباب في الاردن منخرطين في كافة القضايا سواء حماية البئية اوالدفاع عن لقمة العيش اوحق العمل الذي كفله الدستور، واضرابات زيادات الاجور الواسعة، وعن حقوق الطلبة اوفي النشاط النقابي المهني والعمالي عموما، "ذبحتونا" و"لا لرفع الاسعار" وضد المدعوة زورا وبهتانا "جرائم الشرف".. اوفي التنظيمات الاسلامية بمختلف تلاوينها، وهاي سياسة كمان..ووصلت معهم كمان على "التنطيمات المتطرفة،" ففي نهرالبارد اوفي العراق شباب الاردن كانوا اللّوحية وراس طابور اذا بدك.. وبلا ما نسمي اسماء. وماذا عن الاسرى الاردنيين في سجون الاحتلال - قققفا؟ مين همه فئة الشباب اللي بيحكي عنها الملك؟ وعن اي سياسة ؟ شو قصده؟! ما الناس بتشرب سياسة وبتوكل سياسة وبتلوك وبتكرخن سياسة في البلد، شو ظايل فيها شباب وسياسة؟

• ناصر جودة، الناطق باسم الحكومة، وحسب ما نقل في الصحف المحلية نفى الشائعات. انا كلفت حالي وقريت التصريحات تبعته، اي نفي هذا، اذا هذا نفي كيف بكون نفي النفي؟! انا بحيلكوا لناس عقال بهالمجال وانتو احكموا.
• المشروع القادم اللي بفكر اعمله هو جردة حساب عن الاردن والفورة النفطية الثانية في المنطقة. كيف يعبرها وباي شكل نتأثر بها حاليا مقارنة الفترة السابقة؟ تقديراتي الاولية انه الفوارق كبيرة.. وانه اذا بعز هالفورة وبرميل النفط قافز عن 117 -119 دولار وبعدنا محلنا، بالعكس بنرجع لورا كثير، لعاد شو جنس الكوارث الجاية.. بانتظار اقتراحاتكم.